OKTUBRE 19, 2025 — Nagluluksa ang mundo ng nu-metal matapos kumpirmahin ng Limp Bizkit ang pagpanaw ng kanilang bassist at co-founder na si Sam Rivers, 48 anyos.

Sa isang emosyonal na post sa social media, inilarawan ng banda si Rivers bilang hindi lang basta bass player. 

Anila, “Sam brought a light and a rhythm that could never be replaced. His talent was effortless, his presence unforgettable, his heart enormous.” 

(Nagbigay si Sam ng liwanag at ritmo na hindi kailanman mapapalitan. Natural ang kanyang talento, hindi malilimutan ang kanyang presensya, at napakalaki ng kanyang puso.)

Hindi ibinahagi ang sanhi ng kanyang pagkamatay, ngunit matagal nang alam ng fans ang laban ni Rivers sa liver disease dulot ng labis na pag-inom. Noong 2015, pansamantala siyang lumayo sa banda para magpagamot. 

Sa panayam sa aklat na Raising Hell, sinabi niya: “I quit drinking and did everything the doctors told me. I got treatment for the alcohol and got a liver transplant, which was a perfect match.” 

(Tumigil ako sa pag-inom at sinunod lahat ng bilin ng mga doktor. Nagpagamot ako at nagkaroon ng liver transplant na swak na swak.)

Si Rivers ay bahagi ng orihinal na lineup ng Limp Bizkit mula pa noong 1994, kasama sina Fred Durst, John Otto, Wes Borland, at DJ Lethal. Sumikat ang banda sa huling bahagi ng dekada ’90 sa kanilang agresibong tunog na pinaghalo ang metal, hip-hop, at punk. Tumatak sa mainstream ang mga album nilang Significant Other at Chocolate Starfish and the Hot Dog Flavored Water, pati na rin ang mga kantang “Rollin’ (Air Raid Vehicle)” at “Take a Look Around.”

Bukod sa musika, kinilala rin si Rivers sa kanyang mga gawaing pangkawanggawa. 

Ayon kay DJ Lethal: “You will live on through your music and the lives you helped save with your music, charity work, and friendships.” 

(Mabubuhay ka sa musika mo at sa mga buhay na nailigtas mo sa pamamagitan ng musika, kawanggawa, at pagkakaibigan.)

Bagamat wala nang bagong album mula sa banda mula 2021, aktibo pa rin sila sa mga live performance. Nitong Agosto, tumugtog sila sa Reading Festival at naglabas ng bagong single noong Setyembre.

Sa ngayon, nananawagan ang banda ng respeto para sa pamilya ni Rivers. Isa siyang haligi ng tunog ng Limp Bizkit at ng buong nu-metal era.

(Larawan: Yahoo)