ANGELES CITY, Pampanga — Dalawang suspek ang naaresto ng mga awtoridad matapos gamitin ang isang deepfake video ni Pangulong Ferdinand Marcos Jr. sa isang investment scam na umanoy nakapanloko ng isang doktora ng mahigit ₱93 milyon.

Ayon sa ulat ng GMA News, isinagawa ng Philippine National Police – Criminal Investigation and Detection Group (PNP-CIDG) ang entrapment operation sa isang coffee shop sa Angeles City, kung saan nahuli ang dalawang suspek matapos tanggapin ang markadong pera na bahagi ng ₱20 milyong investment na hinihingi nila sa biktima.

Kinilala ang biktima bilang si Dr. Marie Faith Sagun-Villarta, na naengganyo umanong mag-invest matapos ipakita sa kanya ng mga suspek ang isang pekeng video ni Pangulong Marcos Jr. na ginamit upang palakasin ang kredibilidad ng kanilang investment scheme. Bukod dito, binigyan pa umano siya ng mga mamahaling regalo gaya ng bag, relo, at dalawang sasakyan, na sinabing galing mismo sa Pangulo.

Ayon sa doktora, pinangakuan siya ng 20% hanggang 30% na kita sa kanyang investment. “That time magpa-file ng candidacy yung mga politicians, parang year 2024,” aniya, kaya’t mas naging kapanipaniwala sa kanya ang presentasyon ng mga suspek.

Patuloy ang imbestigasyon ng mga awtoridad upang matukoy kung may iba pang biktima at kung sino pa ang sangkot sa operasyon ng sindikato. Pinag-aaralan din ng mga eksperto ang ginamit na deepfake video upang matukoy ang pinagmulan nito at kung paano ito na-manipula.

Ang insidente ay muling nagbigay-diin sa panganib ng deepfake technology sa panlilinlang at panloloko, lalo na sa mga sensitibong usapin gaya ng politika at pananalapi.