December 17, 2025 — Nauwi sa rambol ang prusisyon ng Poong Nazareno sa Tondo, Maynila matapos magsalpukan ang ilang kabataan, kung saan isang menor de edad ang nanaksak at nagdulot ng pagkasugat ng dalawang tao.

Nakuhanan ng CCTV ang insidente noong Lunes ng gabi habang isinasagawa ang prusisyon. Makikita sa video na ilang kabataan ang nagtulungan laban sa isang lalaking nakasuot ng puting t-shirt. Sa gitna ng gulo, isang kabataang nakaitim ang tumarak ng patalim sa likod ng biktima.

Kinilala ni Barangay 202 chairperson Winnie Sebastian ang mga nasugatan: isang babae na nagtamo ng dalawang saksak, at isang lalaki na nasa kritikal na kondisyon matapos tamaan ng apat na beses. “Dalawa ‘yung tama ng babae, ‘yung lalaki naman medyo kritikal, apat ang tama,” ayon kay Sebastian.

Dagdag pa niya, tila nagkaroon ng rambol sa gitna ng prusisyon. “Parang nag-rambulan na sila eh, kung sino na lang ‘yung mahablot. Siyempre pagtatanggol ng isang kaibigan niya ‘yung kaibigan niyang nasaktan,” paliwanag ng opisyal.

Patuloy na iniimbestigahan ng pulisya ang insidente at tinutukoy ang pagkakakilanlan ng mga sangkot na kabataan. Nagsasagawa na rin ng follow-up operations upang mahanap ang suspek na menor de edad na nanaksak.

Ang insidente ay nagdulot ng pangamba sa mga deboto at residente ng Tondo, lalo na’t kilala ang prusisyon ng Nazareno bilang isa sa pinakamalaking religious gatherings sa bansa. Ayon sa mga awtoridad, mas paiigtingin pa ang seguridad sa mga susunod na aktibidad upang maiwasan ang kahalintulad na gulo.

Larawan mula Brgy. 202