AGOSTO 29, 2025 — Tuloy na ang matagal nang inaabangang initial public offering (IPO) ng Maynilad Water Services Inc. ngayong Oktubre, matapos ang ilang buwang pagkaantala bunsod ng global market volatility at negosasyon sa mga investor.

Ayon sa pinakabagong dokumento ng kumpanya, itinakda ang pricing ng shares sa Oktubre 13, habang ang bentahan ay magaganap mula Oktubre 16 hanggang 22. Inaasahang ililista ang Maynilad sa Philippine Stock Exchange sa Oktubre 30.

Ang IPO ay nagkakahalaga ng hanggang ₱45.8 bilyon, kung saan ibebenta ang kabuuang 2.29 bilyong shares sa presyong hindi lalampas sa ₱20 kada isa. Kabilang dito ang 1.66 bilyong bagong common shares, 24.9 milyong shares na nakalaan para sa First Pacific Company, 354.7 milyong secondary shares mula sa kasalukuyang shareholders, at 249.05 milyong shares bilang overallotment option.

Naantala ang orihinal na schedule ng IPO matapos ang pambobomba ng U.S. sa nuclear facilities ng Iran, na nagdulot ng panandaliang kaguluhan sa merkado. Gayunpaman, ayon sa Maynilad, ang bagong iskedyul ay tugon sa matatag na interes mula sa mga tinatawag na strategic cornerstone investors.

“These investors have conveyed strong and sustained interest in participating in the offering, but requested additional time to complete their internal approval processes,” pahayag ng kumpanya. 

(Ipinahayag ng mga investor na ito ang matibay at tuloy-tuloy na interes sa paglahok sa alok, ngunit humiling sila ng karagdagang panahon upang tapusin ang kanilang internal na proseso ng pag-apruba.)

Dagdag pa ng Maynilad, inaasahang magdadala ng dagdag na halaga sa IPO ang partisipasyon ng mga investor na ito at positibong tatanggapin ito ng merkado.

Ang malilikom mula sa bentahan ng bagong shares ay ilalaan sa capital expenditure program ng kumpanya para sa 2025–2026, na nakatuon sa pagpapabuti ng water supply, wastewater management, at customer service systems. Bahagi rin ng pondo ay maaaring gamitin para sa pangkalahatang gastusin ng kumpanya.

Ang BPI Capital Corp. ang Domestic Lead Underwriter, habang ang HSBC, Morgan Stanley, at UBS ang mga International Underwriters.

(Larawan: Maynilad Water Services, Inc.)