Setyembre 7, 2025 – Isang pambansang pahayagan sa Estados Unidos, ang Washington Post, ang nagbigay-pansin sa “Budots,” ang natatanging electronic dance at musika na nagmula sa Davao City at ngayo’y kinikilalang bahagi ng makabagong kulturang Pilipino.

Sa inilathalang feature, inilarawan ng Washington Post ang Budots bilang isang grassroots na likhang musika mula sa komunidad, na sumikat noong dekada 1990 sa pamamagitan ng mga kabataang nagtitipon sa kalsada at sayawan. Ang tunog nito ay kinilala bilang kombinasyon ng elektronikong beats, ingay ng lungsod tulad ng busina ng jeepney at kalansing ng mga kariton, at mga tribong ritmo na nagbibigay ng kakaibang enerhiya at identidad.

Pinuri ng ulat ang kontribusyon ni Sherwin Calumpang Tuna, o mas kilala bilang DJ Love, na tinukoy bilang pangunahing tagapagpauso ng Budots. Ayon sa kanya, ginawa niya ang mga unang Budots mix upang magbigay ng masayang alternatibo sa kabataan na nahaharap sa mga suliranin gaya ng droga at karahasan. Kalaunan, naging bahagi ito ng kaswal na kasiyahan, piyesta, at maging sa mga lokal na kampanya sa politika.

Hindi nagtagal, lumaganap ang Budots mula sa Davao patungong iba’t ibang rehiyon ng bansa, bago tuluyang nakatawid sa pandaigdigang entablado. Sa kasalukuyan, tampok ito sa mga viral na video at dance challenges sa social media platforms gaya ng TikTok, na lalo pang nagpaigting sa kasikatan nito.

Ayon sa Washington Post, ang Budots ay hindi lamang isang sayaw o tunog kundi repleksyon ng malikhaing kakayahan ng mga Pilipino na makalikha ng bagay na simple ngunit kaakit-akit. Ang pagkilala mula sa isang prestihiyosong pahayagan sa Amerika ay nakikitang malaking hakbang para sa pagpapakilala ng kulturang Pilipino sa mas malawak na mundo.

Larawan mula sa Wahington Post