Agosto 19, 2025 - Pinalawak ng Microsoft ang paggamit ng artificial intelligence matapos nilang ipakilala ang bagong Copilot function sa Excel. Sa pamamagitan nito, maaari nang gamitin ng mga user ang AI mismo sa bawat cell ng kanilang spreadsheet.

Gamit ang bagong formula na =COPILOT(...), puwedeng mag-type ng simpleng instruction ang user at awtomatikong gagawa ng task ang AI. Kabilang dito ang pag-classify ng data, paggawa ng buod, o kahit pagbuo ng table nang hindi na kailangan ng komplikadong formula.

Unang makaka-access ng feature ang mga nasa Microsoft 365 Copilot Beta Channel. Sakop nito ang Windows (version 2509 pataas) at Mac (version 16.101 pataas). Nakatakdang ilabas din ito sa web version sa mga susunod na buwan.

Katulad ng karaniwang formula, simple lang din ang paggamit. Halimbawa, kung nais i-classify ang customer feedback mula sa isang column, maaaring ilagay ang utos na:

=COPILOT("Classify this feedback", D4:D18)

Lalabas agad ang resulta sa mga piling cell. Maaari rin itong pagsamahin sa ibang formula ng Excel para mas tiyak ang output.

Gayunman, nilinaw ng Microsoft na may ilang limitasyon ang feature. Wala pa itong koneksyon sa internet, kaya ang mga datos lang sa loob ng spreadsheet ang kayang i-proseso. May limitasyon din sa paggamit, hanggang 100 beses lamang bawat 10 minuto. Bukod pa rito, hindi inirerekomenda ang paggamit nito para sa sensitibong impormasyon tulad ng legal o compliance data.

Batay sa Microsoft, ang Copilot function ay nakabase sa OpenAI GPT-4.1-mini. Kasunod ito ng iba pang generative AI tools na unti-unti nang idinadagdag sa mga produkto ng kumpanya.