SOUTH COTABATO, Philippines — Patuloy pa rin ang masusing imbestigasyon ng Department of Social Welfare and Development (DSWD) Region 12 kaugnay sa insidente ng isang ama na umano’y nambatok sa kanyang anak matapos itong hindi manalo sa isang push bike competition na ginanap sa Surallah, South Cotabato.

Sa panayam ng Brigada NewsFM Manila, kinumpirma ni DSWD 12 Regional Director Loreto Cabaya na personal na tutungo ang ahensya ngayong araw sa tahanan ng pamilya na matatagpuan sa Polomolok, South Cotabato upang masuri ang aktuwal na kalagayan ng bata at ng kanyang pamilya. Ayon kay Cabaya, mahalaga ang agarang pagdalaw upang magkaroon ng malinaw at kumpletong larawan ng sitwasyon, lalo na sa aspeto ng kaligtasan at kapakanan ng bata.

Kasama sa isasagawang pagdalaw ang pakikipag-ugnayan sa ina ng bata at iba pang kamag-anak, gayundin ang pagsasagawa ng medical at psychological evaluation sa menor de edad. Layunin nitong matukoy kung ang bata ay nakaranas ng pisikal o emosyonal na pinsala at kung may pangangailangan ng agarang interbensyong medikal o psychosocial support.

Dagdag pa ng DSWD, sisiyasatin din kung may mga naunang insidente ng pang-aabuso sa loob ng pamilya at kung ligtas pang manatili ang bata sa kustodiya ng ama. Kung kinakailangan, handa ang ahensya na magpatupad ng angkop na protective measures alinsunod sa mga umiiral na batas sa pangangalaga ng mga bata, kabilang ang pansamantalang paglalagay sa alternative care. Muling iginiit ng DSWD na hindi kailanman katanggap-tanggap ang anumang uri ng karahasan laban sa mga bata, anuman ang dahilan. Hinikayat din ang publiko na agad mag-ulat ng mga kahalintulad na insidente upang maagapan ang posibleng mas malalang pang-aabuso at matiyak ang kapakanan ng bawat bata. (Larawan: Facebook)