DISYEMBRE 16, 2025 — Isang dating mataas na opisyal ng Department of Public Works and Highways (DPWH) ang nagbalik ng malaking halaga sa pamahalaan bilang bahagi ng kasong may kinalaman sa maanomalyang proyekto sa flood control.

Si Engr. Gerard Opulencia, dating Regional Director ng DPWH-National Capital Region, ay nag-turn over ng ₱40 milyon sa Department of Justice (DOJ). Ang naturang halaga ay bahagi ng kanyang pangakong ibalik ang kabuuang ₱150 milyon na nakuha mula sa mga kuwestiyonableng transaksyon noong siya’y nakatalaga sa NCR.

Ayon kay Justice Secretary Fredderick Vida, malinaw ang kondisyon sa kasunduang nilagdaan ni Opulencia: ang pagbabalik ng pera ay kapalit ng buong benepisyo bilang state witness. 

Kasama si Opulencia sa mga respondent sa reklamong kaugnay ng flood control projects sa Bulacan na kasalukuyang iniimbestigahan ng DOJ. Ang mga reklamo ay tumutukoy sa malversation of public funds, falsification of public documents, perjury, at paglabag sa Republic Act 3019 o Anti-Graft and Corrupt Practices Act.

Nagpaliwanag si Prosecutor General Richard Anthony Fadullon na bagama’t hindi nakatanggap si Opulencia ng pera mula sa mga proyekto sa Bulacan, may mahalaga siyang kaalaman sa mga nangyari. 

“Actually, his testimony pertains to the cases that occurred in Bulacan. However, the restitution of funds was based on the transactions he was involved in back when he was NCR director,” ani Fadullon. 

(Ang kanyang testimonya ay tumutukoy sa mga kaso sa Bulacan. Gayunman, ang pagbabalik ng pera ay batay sa mga transaksyon noong siya’y NCR director.)

Dagdag pa niya, “Regarding the flood control projects in Bulacan currently under investigation, he did not receive anything, nor did he get any share.” 

(Tungkol sa mga flood control projects sa Bulacan na iniimbestigahan, wala siyang natanggap o nakuhang bahagi.)

Mahalaga ang testimonya ni Opulencia kaya’t pansamantala siyang tinanggap sa Witness Protection Program. 

Ang ₱40 milyon ay dadalhin sa Land Bank at Bureau of the Treasury para sa beripikasyon.

Bukod kay Opulencia, iba pang opisyal ng DPWH sa Bulacan ang nagsauli na ng yaman. Si Engr. Henry Alcantara ay nagbalik ng ₱110 milyon at nangakong ibabalik pa ang kabuuang ₱300 milyon. Si Roberto Bernardo naman ay nagbigay ng access sa kanyang bank account na may ₱7 milyon, ngunit kasalukuyang frozen ang mga ito sa utos ng Anti-Money Laundering Council. Samantala, si dating District Engineer Brice Hernandez ay nagsuko ng dalawang luxury vehicles — isang Lamborghini Urus at GMC Yukon Denali — sa Independent Commission for Infrastructure.

Ang mga pagsasauli na ito ay nakikitang hakbang ng mga sangkot upang makipagtulungan sa imbestigasyon at maiwasan ang mas mabigat na pananagutan sa korte.

(Larawan: YouTube)