UTAH, USA – Pormal nang kinasuhan ng aggravated murder ang isang 22-anyos na lalaki mula southern Utah kaugnay sa pagpatay sa kilalang right-wing political activist na si Charlie Kirk.

Kinilala ang suspek bilang Tyler Robinson, na nahaharap din sa mga kasong felony discharge of a firearm, witness tampering, at obstruction of justice. Ayon kay Utah County Attorney Jeff Gray, kanilang hihilingin ang parusang kamatayan laban kay Robinson.

Batay sa mga rekord ng korte na inilabas nitong Martes, lumitaw na ang posibleng motibo ni Robinson ay dahil umano sa matinding galit niya kay Kirk. Sa mga mensahe sa kaniyang nobya matapos ang pamamaril, inamin umano ni Robinson na ginawa niya ito dahil “sawa na siya sa kanyang galit.”

Bukod dito, sa mga chat sa Discord, nagbiro pa umano ang suspek na para bang may “doppelgänger” na gumawa ng krimen, bago tuluyang umamin na, “Ako ‘yun.”

Ayon naman kay FBI Director Kash Patel, natuklasan din ang isang sulat-kamay na tala kung saan idineklara ni Robinson na sasamantalahin niya ang pagkakataon para patayin si Kirk. Ibinunyag ito ni Patel sa kaniyang pagharap sa Kongreso, kung saan siya mismo ay nakararanas ng matinding pagsusuri kaugnay ng kaniyang pamumuno sa ahensya.

Matatandaang sumuko si Robinson sa mga awtoridad noong Huwebes ng gabi, humigit-kumulang 33 oras matapos pagbabarilin si Kirk sa Utah Valley University, habang nagsasalita sa isang pagtitipon.

Nagkaroon naman ng malawak na pambansang reaksyon matapos ang insidente. Iginiit ng ilang opisyal mula sa administrasyong Trump na may isang umano’y left-wing network na nagpopondo at nagsusulsol ng karahasan laban sa mga konserbatibo—bagaman wala pa silang naipapakitang matibay na ebidensya.

Ang kaso ni Robinson ay inaasahang magiging isa sa mga pinakamalapit na babantayang paglilitis sa Utah, dahil sa bigat ng mga kasong isinampa at sa implikasyong politikal at pambansa ng insidente. (Larawan: Pink News / Google)