ILOCOS REGION — Mahigit ₱22.6 milyon halaga ng tanim na marijuana ang winasak at sinunog ng mga operatiba ng Philippine Drug Enforcement Agency (PDEA) at Police Regional Office 1 sa magkahiwalay na operasyon sa kabundukan ng Ilocos Sur at La Union mula Oktubre 23 hanggang 25.

Ayon kay Police Brig. Gen. Dindo Reyes, natagpuan ng mga awtoridad ang humigit-kumulang 37,800 fully grown marijuana plants sa pitong taniman sa Barangay Licungan, Sugpon, Ilocos Sur noong Sabado, na tinatayang nagkakahalaga ng ₱7.5 milyon.

Noong Biyernes, nadiskubre rin sa parehong barangay ang 40,800 tanim at 20,000 seedlings na may kabuuang halaga na ₱8.1 milyon, ayon kay PDEA Region 1 Director Benjamin Gaspi.

Samantala, sa La Union, sinunog ng mga operatiba ang 11,300 tanim at 2,830 seedlings na nagkakahalaga ng ₱2.3 milyon sa isa pang operasyon sa kabundukan.

Ang mga taniman ay matatagpuan sa mga liblib na lugar na mahirap marating, kaya’t ginamitan ng aerial surveillance at ground patrol upang matukoy ang eksaktong lokasyon. Wala pang naarestong suspek sa operasyon, ngunit patuloy ang imbestigasyon upang matukoy ang mga responsable sa iligal na taniman.

Ang pagsira sa mga tanim na ito ay bahagi ng pinaigting na kampanya ng gobyerno laban sa iligal na droga sa rehiyon, lalo na sa mga lugar na kilalang taniman ng marijuana.